Жанры
Регистрация
Читать онлайн Умрим есталиклари бесплатно

Умрим есталиклари



“Дийдор ғанимат” китобидан

ҚАЛАМ

  • Ё пирим, деб йўлга чиқдим,
  • Йўлда йўлдошим қалам.
  • Ҳам сиру асрорим айтсам,
  • Ёру сирдошим қалам.
  • Гоҳ қувонсам, гоҳ куюнсам,
  • Танти тенгдошим қалам.
  • Дилдаги дардимни айтсам,
  • Сабру бардошим қалам.
  • Гоҳ насиҳатгўй вале,
  • Қавму қариндошим қалам.
  • Оқилу доно бўлиб,
  • Ишда ишбошим қалам.
  • Юрту элнинг бахтини
  • Куйла, сирдошим қалам.
  • Ўктам айтур шу сабаб,
  • Йўлда йўлдошим қалам.

МЕНИНГ ИШҚИМ

  • Менинг ишқим ҳамон бўлгай, севар ёрим омон бўлса,
  • Севар ёру диёримда ҳамон шундай замон бўлса.
  • Ажаб барно, ажаб доно, ажойиб нозу истиғно,
  • Ҳусн мулкида ул Лайло каби соҳибжаҳон бўлса.
  • Қаро кўзу қаро холу қаро сочини айтайму,
  • Кўнгилни шод этарга ул қаро қоши камон бўлса.
  • Келишган қомати шамшод, нигоро, интизор этма,
  • Не тоқат айлайин мен бир томон, у бир томон бўлса.
  • Уни севмоқ билан шодман, бу йўлдан кечмагум асло,
  • Агар севги гуноҳ бўлса, агар севги ёмон бўлса.
  • Ўшал хушхулқли ёр бирла қилурга шарҳи ҳол Ўктам,
  • Наманган боғидай кўркам, латофатли чаман бўлса.

ҲЕЧ КИМНИ ЎХШАТОЛМАДИМ

  • Кимга қиёс этай мен, ёр, қадди-қоматингни,
  • Ёр, қадди-қоматингни, дилбар латофатингни.
  • Дилбар латофатингга жоним садоға бўлса,
  • Жоним садоға бўлмай кўрсат садоқатингни.
  • Садоқатли нигоро, сунбул сочингга борман,
  • Сунбул сочингни ўйнаб қилдинг кароматингни.
  • Қилдинг кароматингни, тушди бошимга савдо,
  • Инсонму ё малакму, билолмадим зотингни.
  • Билолмадим зотингни, қилмадинг илтифот ҳам,
  • Сенга таадди айлаб кездим вилоятингни.
  • Кездим вилоятингни тополмай ўхшашингни,
  • Васфингни ёза-ёза такрорладим отингни.
  • Такрорладим отингни меҳру муҳаббат билан,
  • Муҳаббатинг ёр бўлди, кўрдим саодатингни.
  • Барнолигингни Ўктам куйлар экан ҳамиша,
  • Дариғ тутма, нигоро, биздин иноятингни.

ДИЙДОР ҒАНИМАТДУР, ГУЛИМ

  • Кўргани келдим сани, дийдор ғаниматдур, гулим,
  • Интизор этма мани, дийдор ғаниматдур, гулим.
  • Севганим соҳибжамол, ҳусни паридек баркамол,
  • Келганим кўрма малол, дийдор ғаниматдур, гулим.
  • Севганим ойдек тўлар, сал кўрмасам кўргим келар,
  • Бирга ўлтиргим келар, дийдор ғаниматдур, гулим.
  • Ўйнагин гул-гул ёниб, зулфинг белингда тўлғониб,
  • Бўлса суҳбатлар қониб, дийдор ғаниматдур, гулим.
  • Ёшлигинг бахтинг-ку, жон қадрига ет, сарвиравон,
  • Ўтгуси елдек бу он, дийдор ғаниматдур, гулим.
  • Севгимиз ёд айлагил, суҳбатни обод айлагин,
  • Ўктаминг шод айлагин, дийдор ғаниматдур, гулим.

ЎТДИ ГЎЗАЛИМ

  • Ўтди гўзалим у томондан бу томонга,
  • Солмай назарин биз каби яхшию ёмонга.
  • Билмам неча йил қилгуси ул жабрини жонон,
  • Ҳижрон азоби рангимни ўхшатди сомонга.
  • Бир мен эмас ишқида куйган, неча ошиқ
  • Ваҳ-ваҳ, қиё боқмади ул аҳли замонга.
  • Сабрим тугагач журъат этиб йўлини тўсдим,
  • Таклиф этайин юрса агар боғу чаманга.
  • Чимрилди қоши, бир силкиниб кетди йўлига,
  • Ҳай-ҳай, онинг кокиллари тегди товонга.
  • Бу ҳолни кўриб маст бўлибон учди хаёлим,
  • Гўёки сайд сайёдини олди нишонга.

АЙРИЛИБ БЎЛМАС

Машрабга ўхшатма
  • Суюкли ёрим, эй жонон,
  •        ўзингдан айрилиб бўлмас,
  • Қаро кўз-қошларинг, эй жон,
  •        сўзингдан айрилиб бўлмас.
  • Соғиндим мен жамолингни,
  •        юзингда якта холингни,
  • Қачон кўргум висолингни,
  •        кўзингдан айрилиб бўлмас.
  • Фироқингда ётиб бедор,
  •        қаро сочинг қилиб хумор,
  • Қачон топгум севикли ёр,
  •        юзингдан айрилиб бўлмас.
  • Юрибдурман бу чаманда
  •        эсу ақлим бўлиб санда,
  • Қачон топгум Наманганда,
  •        изингдан айрилиб бўлмас.
  • Соғиндим мен ниҳоятда,
  •        карам бўлса иноятда,
  • Қўшиқ айтарди ғоятда,
  •        созингдан айрилиб бўлмас.

BИCOЛ

  • Менинг кўнглимни сайд этган ўшал кўзи хуморидур,
  • Ёзиб мадҳини байт этган қаро қоши ҳилолидур.
  • Муҳаббатнинг ниҳоли йилма-йил барқ уриб ўсди,
  • Қуёшдек парвариш этган гўзал ёрнинг висолидур.
  • Нигоримнинг юзин кўрсам очилгайдир дили бағрим,
  • Қувончим кўкка сиғмай ёзибман дилда боридур.
  • Севикли дилрабони таърифига сўз тополмасдан,
  • Чалиб соз тавсиф этдим, кўнгилда жоннинг торидур.
  • Сочингга оқ тушубдир, деб таажжуб қилмангиз, дўстлар,
  • Кўнгил ёшдур, бу соч оқи муҳаббатни қировидир…

РОҲАТ

  • Дили жоним қилур роҳат кўзингга термилиб турсам,
  • Тўлин ойдек жамолингга, юзингга термилиб турсам.
  • Висол боғи сенинг васлинг билан обод, эй дилбар,
  • Чаман аро очилгай дил, ўзингга термилиб турсам.
  • Шакаргуфтор нигорим нутқини жон деб эшитгайман,
  • Кўнгил тоғдек ўсар ҳай-ҳай, сўзингга термилиб турсам.
  • Сенга ортар мани меҳрим, ҳалол меҳнатда Ўктамман,
  • Зафар қучганда таққан юлдузингга термилиб турсам.

МЕҲМОНИ БЎЛИБ ЎЛТИРДИМ

  • Бахтим борки, шаҳло кўзнинг
  •        меҳмони бўлиб ўлтирдим,
  • Гўзал юзу ширин сўзнинг
  •        меҳмони бўлиб ўлтирдим.
  • Ишқ элидаги султоним
  •        фармонига фидо жоним,
  • Қолмай юракда армоним,
  •        меҳмони бўлиб ўлтирдим.
  • Раҳм тушдими дилига,
  •        номимни олди тилига,
  • Сўзлар ширин хил-хилига,
  •        меҳмони бўлиб ўлтирдим.
  • Кўкда порлаган юлдузнинг,
  •        сунбул кокили қундузнинг,
  • Ўктамжон, ул гўзал қизнинг
  •        меҳмони бўлиб ўлтирдим.

КЎЗИ ШАҲЛО КЕЛМАДИ

Навоийдан илҳомланиб
  • Кўзларим йўл устида, ул гулираъно келмади,
  • Гулираъно демаким, ул қадди барно келмади.
  • Қадди барно келса деб кўз тутибман интизор,
  • Интизор айлаб мани қилди таманно келмади.
  • Интизорлик дардини ман ёру дўстга арз этиб,
  • Йўқласин бир бора деб қилдим тавалло, келмади.
  • Қайта-қайта чиқдиму йўлларига, воажаб,
  • Ҳар чиқиб боққанда бўлди меҳри аъло, келмади.
  • Тонггача кўз юммадим аҳволима раҳми келиб,
  • Барқ уриб чиқди қуёш, ул кўзи шаҳло келмади.
  • Келмагай ёрдан умид бор, келмаганин ўйла хўп,
  • Зори гирён йиғлатиб Мажнунни Лайло келмади.
  • Келганим билса маломат қилмасин ағёр, деб,
  • Дўстига айлаб карам ул ақли доно келмади.

БОҒБОН ЙИГИТ ҚЎШИҒИ

  • Сув бўйига гул экарман севгили ёримни деб,
  • Сарвиқомат, сочи сунбул, лола рухсоримни деб.
  • Ўзгача тарҳин тузиб боғни бўстон айладим,
  • Шу гулистонга ярашган кўзи хумморимни деб.
  • Товланиб очилса гул ҳарён муаттар ҳид сочиб,
  • Келса ёр баҳрин очишга ошиқи зоримни деб.
  • Лутф этиб боқса гулим, гулдин кошона айлабон,
  • Андалибдек куйлар эрдим номусу оримни деб.
  • Юртни обод, элни шод этмоқ дилимда муддао,
  • Ўктамо, меҳнат қилурман шу чаманзоримни деб.

ПОКИЗА ГАВҲАРСАН

  • Жамолинг ой каби порлаб кўрингайдир уйингдан ҳам,
  • Менинг наздимда ул равшан ою юлдуз кунимдан ҳам.
  • Қаро кокилларинг васфин десам сунбулму райҳоним,
  • Қараб ҳайрон бўлиб қолдим узун сочинг бўйингдан ҳам.
  • Қошинг қошинг билан пайваст, жамолингга бўлибман маст,
  • Бирор фурсат нари кетмас, хаёлимдан – ўйимдан ҳам.
  • Қачон топгум сени, дилбар, ширинсўзлиқ шакаргуфтор,
  • Олай ором, ёзиб хуммор, қўшиқ айтган куйингдан ҳам.
  • Гўзалсан, шамсу анварсан, ажаб покиза гавҳарсан,
  • Насиб этгаймикин менга ўрин тегмоқ тўйингдан ҳам.
  • Дилинг поку сўзинг поку юзинг поку ўзинг ҳам пок
  • Шунинг-чун ўргилур Ўктам эришган обрўйингдан ҳам.

ДИЛАФРЎЗ РАҚСГА ТУШГАНДА

  • Томоша қил, яшаргай дил
  • Дилафрўз рақсга тушганда,
  • Юзи гул, сочлари сунбул
  • Дилафрўз рақсга тушганда.
  • Келишган қомати шамшод,
  • тиши дур, лаблари ёқут,
  • Кўзи чўлпон, шириндир тил,
  • Дилафрўз рақсга тушганда.
  • Қаро тун чойшабин йиртиб,
  • кўкда барқ урди юлдузлар,
  • Кулиб-қутлаб узатгай гул,
  • Дилафрўз рақсга тушганда.
  • Ҳусн тахтига султонлик
  • ярашган хўб муборак деб,
  • Кўриб унга бўлибман қул,
  • Дилафрўз рақсга тушганда.
  • Кўриб санъатни бундоғ,
  • кечиб жондин деди Ўктам,
  • Молу дунё менга бир пул,
  • Дилафрўз рақсга тушганда.

БИР ПАРИ

  • Субҳидам чоғи эди, ёнимдан ўтди бир пари,
  • Бир парики беназир, соҳибжамоллар сарвари.
  • Юзлари ял-ял ёнар, кўзлар хумор, қошлар камон,
  • Улпарини ишқи бирлан ёзилди кўнгил дафтари.
  • Арғувоний кўйлак ичра салланодир сийми тан,
  • Жон тасаддуқ бўйига мафтун қилар сумбатлари.
  • Сочи сунбулму дейин, яшнаб туришинму дейин,
  • Юрган юришинму дейин, кўргум келур кўрган сари.
  • Илтифот айлаб манга гуфтугў этди калом,
  • Ёзганим бирла адо бўлмас парининг гаплари.
  • Бунча хушрўй, бунча хушбўй, бунча кўркам бўлмаса,
  • Қолмагай Ўктамда армон бўлса шундоғ дилбари.

ЎТДИМ ЯНА КЎЧАНГДАН

  • Қўмсаб юзингни, жонон,
  •        ўтдим яна кўчангдан,
  • Кўзлар бўлиб нигорон,
  •        ўтдим яна кўчангдан.
  • Васлинг умиди бирлан
  •        оҳу фиғон этарман,
  • Ҳолима ҳамма ҳайрон,
  •        ўтдим яна кўчангдан.
  • Висолингга етолмай
  •        фурсат ўтиб бородир,
  • Ғаниматки бу даврон,
  •        ўтдим яна кўчангдан.
  • Висолинг давлатидан
  •        бенасиб қилма, жонон,
  • Ўртага солма ҳижрон,
  •        ўтдим яна кўчангдан.
  • Кўрсам юзингни, жонон,
  •        жамолингга жон қурбон,
  • Ақлим бўлиб паришон,
  •        ўтдим яна кўчангдан.
  • Умид улки, парирўй,
  •        меҳрингни дариғ тутмай
  • Зорингни айла меҳмон,
  •        ўтдим яна кўчангдан.
  • Таъзимни бажо айлаб
  •        тараҳҳум айласанг гар,
  • Ўктам дер тасаддуқ жон,
  •        ўтдим яна кўчангдан.

ЧУСТ ДЎППИСИ

  • Бу азиз бошимга кийсам,
  •        келмас малол Чуст дўпписи,
  • Хушбичим ҳам сержило,
  •        соҳибжамол Чуст дўпписи.
  • Неча гулюз, гултабиат,
  •        зебо сулувлар илкида
  • Топди сайқал минг усулда
  •        гулмисол Чуст дўпписи.
  • Бир қолип, аммо нафосат
  •        бобида юз ноз билан
  • Товланиб қилгай жамолин
  •        баркамол Чуст дўпписи.
  • Офарин санъатга бундоғ
  •        барно йигитга совға деб,
  • Кўз нуридан тикди гул,
  •        битказди ол, Чуст дўпписи.
  • Дўппи тиккан ул сулувга
  •        эҳтиромим беҳисоб,
  • Бош эгиб, раҳмат дедим,
  •        сўзимда бол, Чуст дўпписи.
  • Кўрсалар қардошлар ичра
  •        ўзбеклигимнинг рамзидир,
  • Ўктам айтур, бир умр
  •        бошимда қол, Чуст дўпписи.

КЎЗИМ ИЗЛАР

  • Бу гулшанда гўзаллар кўп,
  •        кўзим излар у дилбарни,
  • Юзи гул, лаблари ёқут,
  •        тиши дур, шамсу анварни.
  • Юрак амри ёмонлик йўқ,
  •        муҳаббат хўп, садоқат хўп,
  • Нетай қалбим унга маҳбуб,
  •        кўзим излар севар ёрни.
  • Ўзи барно, кўзи шаҳло,
  •        ажойиб нозу истиғно,
  • Қиё боққанда кўп маъно,
  •        сўзи дур, шаҳду шаккарни.
  • Унинг покиза меҳри
  •        нуридан қалбим мунаввардир,
  • Тилайдирман, йироқ қилма
  •        ўшандоғ нури гавҳарни.
  • Унинг ёди билан турсам,
  •        унинг ёди билан юрсам,
  • Унинг васлидан ўргилсам,
  •        кўзим излар вафодорни.
  • Ўзингсан яхши дилдорим,
  •        Ўктаминг дер фидо жоним,
  • Сени васфинг ёзиб, ёрим,
  •        тугатдим ушбу дафтарни.

НАВРЎЗИ ОЛАМ

  • Эсди ёқимли бир сабо, Наврўзи оламдир бугун,
  • Созимизда шўх садо, Наврўзи оламдир бугун.
  • Боғимизда тинмагай қумрию тўти чаҳ-чаҳи,
  • Қилди булбул ҳам наво, Наврўзи оламдир бугун.
  • Сув бўйида абру найсон, ялпиз кўтарди бошини,
  • Айди биз дардга даво, Наврўзи оламдир бугун.
  • Оқ ҳарир кўйлак кийиб, олма, ўрик таъзим қилур,
  • Унда яхши муддао, Наврўзи оламдир бугун.
  • Ҳамма хурсанд, ҳамма шод, ўйнаб-кулиб даврон сурар,
  • Шундоғ яшайлик доимо, Наврўзи оламдир бугун.
  • Шоду миннатдормиз, эй муҳтарам дўсту азиз,
  • Даврамизга марҳабо, Наврўзи оламдир бугун.
  • Сарвиқомат дилрабога гулдаста тердим боғ аро,
  • Қутлар уни Ўктам Мирзо, Наврўзи оламдир бугун.

ҲАБИБ САЪДУЛЛА ҒАЗАЛИГА МУХАММАС

  • Висол оқшоми чиқди ул нигоро тарки хоб айлаб,
  • Табассум-ла қилиб таъзим, эҳтиром-ла одоб айлаб.
  • Ёнидан кўрсатиб жой, илтифотин беҳисоб айлаб,
  • Ўтирдим, гул узатди гул атридин гўё гулоб айлаб,
  • Деди ял-ял ёниб менга муҳаббатдин ҳисоб айлаб.
  • Муҳаббат деб гўзал юзга мубталоликни дерларму,
  • Ҳуснда тенги йўқ қизга ё гадоликни дерларму.
  • Қаро сочу қаро кўзга ё адоликни дерларму
  • Ва ёки бир-бирига жон фидоликни дерларму,
  • Жавоб айтинг, деди гул ой юзини офтоб айлаб.
  • Дедим унга: муҳаббат аввало ёрга садоқатдир,
  • Вафодан гул экиб, кўнгил мулкин чоғ этмоқ одатдир.
  • Ҳаёт дарсин ўқирда имтиҳонга қаноатдир,
  • Меҳр сарчашмаси бирла пок диллар шоду ободдур,
  • Дедим, ул маъқул этди, мен эса ёздим китоб айлаб.

СУНБУЛ КОКИЛЛАРИНГМУ

  • Мушки анбар таратган сунбул кокилларингму,
  • Силкинганда қаратган сунбул кокилларингму,
  • Кавсар сувига ботган сунбул кокилларингму,
  • Мани ўзига тортган сунбул кокилларингму,
  • Ақлу ҳушим йўқотган сунбул кокилларингму.
  • Кокил эмас бошингда гўё меҳригиёдир,
  • Кўзлар қарочуғига ҳам қуввати зиёдир.
  • Балки барно юзингни тўсган шарму ҳаёдир,
  • Бегона қўл узалса гўёки аждаҳодир,
  • Ҳижрон ўқини отган сунбул кокилларингму.
  • Камолга ет, нигоро, тўлин ойдай тўлибсан,
  • Шўхликларинг ёқимли, асов тойдай бўлибсан.
  • Ташна юракка гўё оқар сойдай бўлибсан,
  • Гўзалликда беқиёс ҳусни бойдай бўлибсан,
  • Мани ўзига тортган сунбул кокилларингму.

МЕҲНАТСЕВАР ЁРИМСАН

  • Дили жоним, дилоромим, кўзлари хуморимсан,
  • Латофатли жононим, бахтимсан-баҳоримсан.
  • Порлоқ мани иқболим, чин сўзли нигоримсан,
  • Ҳар ишда мададкорим, меҳнатсевар ёримсан,
  • Тасаддуқ сенга жоним, соҳиби жамолимсан.
  • Иқболинг кулиб боққан қайрилма қошларингдан,
  • Юрагимга ўт ёққан кулиб қарашларингдан.
  • Ҳалол меҳнат, шуҳрат-шон нур сочсин бошларингдан,
  • Келажакка ишонган мaғpyp қарашларингдан,
  • Очилур дили баҳрим, чин сўзли нигоримсан.
  • Васлингни ёд этибон булбулдек наво қилсам,
  • Тўлган ой жамолингга қойил деб имо қилсам.
  • Сен менга вафо қилсанг, мен сенга вафо қилсам,
  • Ўктам бахтиёрдир деб оламга садо қилсам,
  • Садоқатли дилдорим, гул юзли баҳоримсан.

ЎЙЛАБ СЕНИ

  • Ёр, сени ўйлаб неча кун-тунлари бедорман,
  • Гул юзингни кўргали ҳар нафас хумморман.
  • Дийдам узра бос қадам, изларингга зорман,
  • Неки фармонинг буюр, бош устига, тайёрман.
  • Бас, сени ширин-шакар суҳбатларингга борман.
  • Мен сени севдим, гулим, ширин каломинг бор учун,
  • Шўх, латиф, нозик табассумли саломинг бор учун,
  • Ҳам яна кўнглингдаги азму қароринг бор учун,
  • Биз каби бечорага лутфу караминг бор учун,
  • Сен менга ғамхўрсану мен ҳам сенга ғамхўрман.
  • Ҳолима наззора қил, эй сарвиноз, эй моҳитоб,
  • Интизорлик дардида қилма жигар-бағрим кабоб,
  • Остонангга келибман қошима бир чиқ, офтоб,
  • Ошиқона маст бўлиб ичдим гулоб, ичдим гулоб,
  • Сарвиқомат бўйларингга мен ўзим хушторман.
  • Жон тасаддуқ, кўйида куйган киши бир мен эмас,
  • Оразин кўрган куйиб, ширин жонидан ғам емас.
  • Ўктаминг дебдур сани, ўзга ёрни ёр демас,
  • Тоҳиру Зуҳро ҳақи ўлтир ёнимда бир нафас,
  • Неки савдо бўлса борман, то умрбод ёрман.

ДЕҲҚОН ҚАСИДАСИ

  • Эрта тонгда туриб юз-қўлин ювиб,
  • Ният-мақсадини покиза қилиб,
  • Ярқироқ кетмонин елкага илиб,
  • Улуғвор касбини муқаддас билиб,
  • Экинзор узра ҳозир-нозир деҳқон.
  • Қоқ-қуруқ тупроқдан ҳосил ундириб,
  • Сув келтириб, бўлмаганни бўлдириб,
  • Меҳнатидан элу юртни тўйдириб,
  • Эгнимизга атлас-кимхоб кийдириб,
  • Улкан ҳосил учун мунтазир деҳқон.
  • Баъзан гап сотамиз осмондан келиб,
  • Гўё у билмайди, фақат биз билиб,
  • Шундоғ сўзлаймизки бағрини тилиб,
  • Шунда ҳам индамас андиша қилиб,
  • Одобу ахлоқда беназир деҳқон.
  • Доим тиқилинчдур, битмайди иши,
  • Тинимсиз меҳнатда баҳор, ёз, қиши.
  • Қалбининг тўрида экин ташвиши,
  • Менимча, оламда табаррук киши –
  • Юртига султону ҳам вазир деҳқон.
  • Дастгоҳлар юрарму деҳқон бўлмаса,
  • Дастурхон тўларму деҳқон бўлмаса,
  • Одамлар куларму ош-нон бўлмаса,
  • Тилагим деҳқонда армон бўлмаса,
  • Минглаб достонларга хўб арзир деҳқон.

ЎЗБЕКИСТОНИМ

Қасида
  • Азизу мўътабарсан, гулу гулшан Ўзбекистоним,
  • Сени мадҳингни айтсам кўксим осмон, Ўзбекистоним,
  • Еринг гавҳар, сувинг кавсар, зарафшон Ўзбекистоним,
  • Эрур ҳар бир тошинг лаъли бадахшон, Ўзбекистоним,
  • Гўзалсан, шамсу анварсан, нурафшон Ўзбекистоним.
  • Сенга таъзим, сенга олқиш, шараф-шон, Ўзбекистоним.
  • Ҳуснда тенги йўқ ўлкам, қилай таъзим жамолингга,
  • Самарқанд, Андижон, Тошкент, Наманган, Марғилонингга,
  • Сиру Жиззах, Бухоро, Хоразм, Сурхон висолингга,
  • Тасаддуқ айлайин жоним сенинг қадду камолингга,
  • Гўзалсан, шамсу анварсан, нурафшон Ўзбекистоним,
  • Сенга таъзим, сенга олқиш, шараф-шон, Ўзбекистоним.
  • Қаю васфинг деяй халқим, ўзинг ҳар ишда моҳирсан,
  • Шеъриятда Навоий, Ҳамза, Ойбек, балки Бобурсан,
  • Тиббиёт, илму нужум, илму ҳикматда жаҳонгирсан,
  • Беруний, Ибни Сино, Улуғбек, Абдуқодирсан,
  • Гўзалсан, шамсу анварсан, нурафшон Ўзбекистоним,
  • Сенга олқиш, сенга таъзим, шараф-шон, Ўзбекистоним.
  • Қилиб меҳнат камол топдим, ғурурим пахтазор ичра,
  • Қўли олтин, юзи гул, тоза кўнгил пахтакор ичра.
  • Яшармен ифтихор айлаб пиллакор, чорвадор ичра,
  • Қарорим тинчлигу меҳнат қавму қардош, дўсти ёр ичра,
  • Гўзалсан, шамсу анварсан, нурафшон Ўзбекистоним,
  • Сенга олқиш, сенга таъзим, шараф-шон, Ўзбекистоним,
  • Муборакбод этиб жумла-жаҳон дур сочди бошингдан,
  • Ўзим ўргулсам арзир тўй ярашган тўйчи ёшингдан,
  • Яшарган боғу роғингдан, ой-юлдуз ҳам қуёшингдан,
  • Шаҳар, қишлоқларингдан, гулга тўлган тоғу тошингдан,
  • Гўзалсан, шамсу анварсан, нурафшон Ўзбекистоним,
  • Сенга таъзим, сенга олқиш, шараф-шон, Ўзбекистоним.

ИНСОН ҚАДРИ

  • Меҳнатин чекмай киши билмагай нон қадрини,
  • Бошига иш тушмаса, билмас қадрдон қадрини,
  • Жон ачиб, дард чекмаган билмас экан жон қадрини,
  • Беқадрлар на билур шуҳрат ила шон қадрини,
  • Ошиқ бўлмасдан киши билмайди жонон қадрини,
  • Ҳақ йўлин топгач одам билгайдир инсон қадрини.
  • Кунлар ўтгай, ойлар ўтгай, қилгин отангнинг урматин,
  • Меҳрибон, мунис ўшал мушфиқ онангнинг ҳурматин,
  • Ҳам яна ул жонажон сингил-опангнинг ҳурматин,
  • Қил бажо ўз даврида ини-оғангнинг ҳурматин,
  • Ошиқ бўлмасдан киши билмайди жонон қадрини,
  • Ҳақ йўлин топгач одам билгайдир инсон қадрини.
  • Хушнуд ўтган ҳар куну ҳар он муборакдир сенга,
  • Қадри ҳол қилган ишинг имкон муборакдир сенга,
  • Зарра бўлсин яхши шуҳрат, шон муборакдир сенга,
  • Яхши ишга яхши сўз – достон муборакдир сенга,
  • Ошиқ бўлмасдан киши билмайди жонон қадрини,
  • Ҳақ йўлин топгач одам билгайдир инсон қадрини.
  • Яхши ишлаб, яхши сўзла, беҳудага кун ўтмасин,
  • Биз дегаймиз қалбимиздан нури имон кетмасин,
  • Ақлу идрок, илму урфон асло бизни тарк этмасин,
  • Бахтимизга меҳру шафқат, тоза виждон йитмасин,
  • Ошиқ бўлмасдан киши билмайди жонон қадрини,
  • Ҳақ йўлин топгач одам билгайдир инсон қадрини.

БАЛЛИ СЕНГА, ДЕҲҚОН ҚИЗ

  • Ўз эрки ўз қўлида бахтиёрлик топган қиз,
  • Ҳалол меҳнати билан эл-юртига ёққан қиз,
  • Кетмонни улоқтириб машинага боққан қиз,
  • Пўлат отни елдирган, чавандоз қиз, чаққон қиз,
  • Сарвиқомат, гул юзли, ишда марду майдон қиз,
  • Пахтазорнинг юлдузи, балли сенга, деҳқон қиз.
  • Ваъда қилиб Ватанга, белни маҳкам боғлабсан,
  • Камолотда ўзингни Мунаввардек чоғлабсан.
  • Пўлат отга ўлтириб меҳнатни сўроқлабсан,
  • Юртимиз осмонида Зуҳродек чарақлабсан,
  • Сарвиқомат, гул юзли, ишда марду майдон қиз,
  • Пахтазорнинг юлдузи, балли сенга, деҳқон қиз.
  • Тулпоринг елдирибсан, хизматингга минг раҳмат,
  • Эл бахтини ўйлабсан, ҳимматингга минг раҳмат,
  • Алп йигитдай азмингга, ғайратингга минг раҳмат,
  • Дўстларни кулдирибсан, ҳурматингга минг раҳмат,
  • Сунбул сочли, чин сўзли, ишда марду майдон қиз,
  • Пахтазорнинг юлдузи, балли сенга, деҳқон қиз.

МАДҲИЯ

  • Ассалому алайкум, гўзал Андижон,
  • Таърифинг тилларда ғазал, Андижон.
  • Ғазал эмас, балки достон, Андижон,
  • Қаҳрамонлар юрти бўстон, Андижон,
  • Бобурлар юлдузи нур сочган юртим,
  • Ҳатто тош устида гул очган юртим.
  • Сенда меҳнат аҳли топгандир роҳат,
  • Бир парча ерига қўйиб садоқат.
  • Пахтазоринг кўрдим, ҳосил қатма-қат,
  • Йўлларинг бўйида қатор иморат,
  • Олқиши ўзига ярашган юртим,
  • Ой-кун меники деб талашган юртим.
  • Андижон, тарихингдан куйласам,
  • Машҳур Ипак йўли ўтган, ўйласам,
  • Олимларинг, шоирларинг сўйласам,
  • Ҳижронингда куйган экан ўйласам,
  • Бўз ерлар қўшиғинг куйлатган юртим,
  • Нодира бешигин тебратган юртим.
  • Гўзал Намангандан кўргани келдим,
  • Ипак йўлларингдан юргани келдим,
  • Боғларингда ўйнаб, кулгани келдим,
  • Куйганёрда меҳмон бўлгани келдим,
  • Меҳмондўст, дилтортар, келишган юртим,
  • Ўн тўрт кунлик ойдай тўлишган юртим.

ОНАЖОН

  • Оқ сут бериб, алла айтиб меҳри тошган онажон,
  • Оқ ювиб, оқ кийдириб, элга қўшган онажон.
  • Бизни деб кечган баридан, илмай кўзига хонумон,
  • Уҳ десак тун-кечалар ташвиш чекиб қилган фиғон,
  • Айтингиз, борму жаҳонда онажондай меҳрибон,
  • Онажоним, онажоним, онажоним, онажон.
  • Биз учун асло ўзин жони кўринмай кўзига,
  • Сол қулоғинг, деб ҳамиша яхшиларнинг сўзига,
  • Қилмагин ҳеч вақт хиёнат сен кишининг тузига,
  • Яхшиликни ўргатиб ўстирди ўғил-қизига,
  • Айтингиз, борму жаҳонда онажондай меҳрибон,
  • Онажоним, онажоним, онажоним, онажон.
  • Кўзга суртайин дерману, изларинг тополмасман,
  • Азизу доно ўшал сўзларинг тополмасман,
  • Меҳр нури билан боққан кўзларинг тополмасман,
  • Қуёшдек нур сочиб турган юзларинг тополмасман,
  • Айтингиз, борму жаҳонда онажондай меҳрибон,
  • Онажоним, онажоним, онажоним, онажон.
  • Яхши ҳамки ҳовлимизда суратингиз бор экан,
  • Кўзларимга тўтиё сийратингиз бор экан,
  • Ҳеч унутмайди сизни ўғил-қизингиз бор экан,
  • Ўктам айтур, барҳаётсиз босган изингиз бор экан,
  • Айтингиз борму жаҳонда онажондай меҳрибон,
  • Онажоним, онажоним, онажоним, онажон.

БОДОМ ГУЛИ

  • Барча гуллардан муқаддам очилур бодом гули,
  • Балки оддий гул эмас, мисли бир достон гули.
  • Баъзилар етди висолга, баъзига ҳижрон гули,
  • Баъзиларга шодлигу баъзиларга ғам гули,
  • Баъзи бирда беҳисобу баъзи бирда кам гули,
  • Бўлсин у шодлик гули, бўлмасин ҳеч ғам гули.
  • Йил ўтиб кетди бу гулга мен етгунимча, дўстлар,
  • Ўтди кунлар, ўтди ойлар мен кутгунимча, дўстлар,
  • Остонасига келиб бир кетгунимча, дўстлар,
  • Бир пиёла чойни ҳўплаб ютгунимча, дўстлар.
  • Барча гуллардан муқаддам очилур бодом гули,
  • Бўлсин у шодлик гули, бўлмасин ҳеч ғам гули.
  • Термулиб қолдим анга, ўтган кунимни эслатур,
  • Сарҳисоб қилсам яна босган йўлимни эслатур,
  • Қанча савдо ўтди бошдан, нутқу тилимни эслатур,
  • Мен суйилдимму-қуйилдим, қулфи дилимни эслатур,
  • Барча гуллардан муқаддам очилур бодом гули,
  • Уйғониб очилдию қолди лол, ҳайрон гули.
  • Баъзи дўстлар бир-бирига жонини қилди фидо,
  • Баъзиларнинг кўз очиб кўрганидин айлаб жудо,
  • Йил ахир шундоқ келиб, шундоқ кетарму доимо,
  • Олам аро яхшилик, тинчлик, омонлик муддао,
  • Барча гуллардан муқаддам очилур бодом гули,
  • Бўлсин у шодлик гули, бўлмасин ҳеч ғам гули.

ЎРГАНДИМ

Бобораҳим Машрабнинг 350 йиллигига бағишланади
  • Ноҳақликка ўт очмоқни бобом Машрабдан ўргандим,
  • Адолат деб курашмоқни бобом Машрабдан ўргандим,
  • Муҳаббатга садоқатни бобом Машрабдан ўргандим,
  • Мураккаб довон ошмоқни бобом Машрабдан ўргандим,
  • Жўшиб дарёки тошмоқни бобом Машрабдан ўргандим,
  • Қилиб исён курашмоқни бобом Машрабдан ўргандим.
  • Бобом Машраб адолат деб Наманган шаҳридан кетди,
  • Ўшал кибру ҳаволарнинг иши жон-жонидан ўтди,
  • Валекин ўзга юртларда бунданам баттар қон ютди,
  • Фиғони кўкка сиғмай ёзди, қўлига қалам тутди.
  • Адолат деб курашмоқни бобом Машрабдан ўргандим,
  • Ноҳақликка ўт очмоқни бобом Машрабдан ўргандим.
  • Бугун ҳам элни алдаб гап ташиб юргучини кўрдим,
  • Такаббурлик билан оқни қаро қилгучини кўрдим,
  • Агар бўлса амалдор, пинжига киргучини кўрдим,
  • Шу боис норасолик даврини сургучини кўрдим.
  • Ноҳақликка ўт очмоқни бобом Машрабдан ўргандим,
  • Адолат деб курашмоқни бобом Машрабдан ўргандим.
  • Бугун эрку адолат деб, сўзлаяпман мен ошкора,
  • Мунофиқлар бадар кетса элим бўлмасди оввора,
  • Ёзилди бу мусаддас, мунофиқлик бўлмаса зора,
  • Умид улдирки, дўстим, тингласа дардимни дилдора.
  • Ноҳақликка ўт очмоқни бобом Машрабдан ўргандим,
  • Адолат деб курашмоқни бобом Машрабдан ўргандим.

УМИД

  • Бўлма ҳайрон, бу жаҳонда йўқни бор қилгай умид,
  • Бурканиб шуҳратга-шонга, ошифта ҳол қилгай умид,
  • Сен умид қилсанг агар, тош устида гул ундириб,
  • Меҳнату ҳиммат билан бахтиёр қилгай умид,
  • Сенда бўлса қанча орзу, қанча синоат, қанча ишқ,
  • Сабр ила, бардош ила барқарор қилгай умид.
  • Умид ул руҳига ҳамкор, ғунчаи ахмар бўлиб,
  • Гоҳида шодлик бўлибон, гоҳида ойдай тўлиб,
  • Гоҳида айтиб ёр-ёру, гоҳида ўйнаб-кулиб,
  • Гоҳида бўлгай дилафгор, гоҳида ҳайрон қолиб,
  • Гоҳида ҳижрон бўлиб, гоҳида бағринг тилиб,
  • Гоҳи маҳзун, гоҳи шод, беихтиёр қилгай умид.
  • Ноумид бўлма жаҳонда, ноумидлик кўп ёмон,
  • Гар умидсиз ўтса умринг қуп-қуруқдир тўрт томон,
  • Гар бошингга тушса савдо, сен умидвор бўл ҳамон,
  • Ҳақ йўлига жо бўлур, ҳаққу ҳақиқат ҳар қачон,
  • Покиза бўлса дилинг, албатта омад сен томон,
  • Умид улдир ҳар нафас қалбингга ёр бўлгай умид.
  • Англашилмасдан баногоҳ бошга тушса можаро,
  • Дейдиганлар топилгайдир ўртада оқни қаро,
  • Бу каби иллат ҳар ишда бўлгусидир даҳр аро,
  • Покиза бўлса дилинг ҳар дам умид бергай садо,
  • Ўктам айтур бир куни “Савту наво”ю “Боғаро”,
  • Сабр ила бардошли бўлсанг, бахтиёр қилгай умид.

ГЎЗАЛЛИК ИЗЛАЙМАН

  • Гўзаллик излайман, оламдан гўзаллик,
  • Оламдаги жумла одамдан гўзаллик…
  • Излайман Юсуфу Канъондан гўзаллик,
  • Ҳусн мулкидаги султондан гўзаллик,
  • Излайман энг яхши достондан гўзаллик,
  • Ва ҳатто ер билан осмондан гўзаллик.
  • Ой юзли қизларнинг жамоли гўзалми,
  • Сунбул сочу қалам қошу холи гўзалми,
  • Ширин суханликдаги боли гўзалми,
  • Ўктам йигитларнинг камоли гўзалми?..
  • Гўзаллик излайман, оламдан гўзаллик,
  • Оламдаги жумла одамдан гўзаллик.
  • Бировга хусумат тошини отмайман,
  • Амал ё мансаб деб эсни йўқотмайман,
  • Келса совуқ шамол дўстга йўлатмайман,
  • Охирида хижолат лойига ботмайман.
  • Гўзаллик излайман оламдан гўзаллик,
  • Оламдаги жумла одамдан гўзаллик.
  • Кишида гўзаллик қарашга боғлиқдир,
  • Аввало тинчлигу тан-жони соғлиқдир,
  • Аъло кайфияту ҳам вақтичоғликдир,
  • Дўстга содиқлик ҳам ўзингга боғлиқдир.
  • Гўзаллик излайман, оламдан гўзаллик,
  • Оламдаги жумла одамдан гўзаллик…
  • Одам борки кўнглида кир бўлмаса дерман,
  • Пок бўлса, дил, ақли басир бўлмаса дерман.
  • Одоб-ахлоқида қуcyp бўлмаса дерман,
  • Яхшилигинг бўлсаю сур бўлмаса, дерман.
  • Гўзаллик излайман, оламдан гўзаллик,
  • Оламдаги жумла одамдан гўзаллик.

ЯХШИЛИК

  • Қулоқ тутсам ҳақиқатни халқ билур,
  • Яхши ишни, ёмон ишни ҳал қилур,
  • Яхшилик қил, сувга от, балиқ билур,
  • Дейди балиқ билмаса холиқ билур,
  • Яхшилик-ёмонлик ўзингдан бўлур,
  • Қилган ишинг ила сўзингдан бўлур.
  • Кишига яхшилик тоатдан афзал,
  • Қилган баъзи ибодатдан афзал,
  • Ҳаётда энг ширин соатдан афзал,
  • Яхшилик – бу барча ҳолатдан афзал.
  • Яхшилик-ёмонлик ўзингдан бўлур,
  • Қилган ишинг ила сўзингдан бўлур.
  • Яхшилик қилай деб аччиқ гапирдинг,
  • Дўстинг нуқсонини очиқ гапирдинг,
  • Хато кетмасин деб ҳатто дуқ урдинг,
  • Яхшилик – бу, уни ҳақ йўлга бурдинг,
  • Яхшилик-ёмонлик ўзингдан бўлур,
  • Қилган ишинг ила сўзингдан бўлур.
  • Қўлингдан келганча қилгин яхшилик,
  • Ёмон ҳам ўзгарар қилсанг яхшилик,
  • Яхшилик бу барча ҳимматдан улуғ,
  • Ўктам айтур яхшилик қил, яхшилик,
  • Яхшилик-ёмонлик ўзингдан бўлур,
  • Қилган ишинг ила сўзингдан бўлур.

ШУКРНИ УНУТИБ ҚЎЙМАНГ

  • Ношукр одамдир ёмон кўрганим,
  • Топган ҳурматидан бўлармиш жудо.
  • Халқимиз нақлидир амал қилганим:
  • “Кенгга кенг дунё – бу, торга тор дунё”.
  • Бир коса ёвғон деб тонгдан кечгача
  • Тинмай меҳнат қилганларни кўрганмиз.
  • Нон дея, нон дея судралиб, йиғлаб,
  • Унга кўп интизорларни кўрганмиз.
  • Узоқ эмас, қирқ беш йилча муқаддам
  • Урушнинг қизиган палласи эди.
  • Уруш орқасида қолган одам ҳам
  • Нон эмас, тополса кунжара еди.
  • Бизлар тегирмонда ёлғиз қолардик
  • Тонггача ухламай битта кўмочга.
  • Жувозкашдан беш пайса ёғ олардик
  • Бир ҳафтадан ортиқ ишлаб омочда.
  • Шунда ҳам нолимай меҳнат қилардик
  • Қариялар, ёшлар дала-тузларда.
  • Топган-тутганини фронтга бериб
  • Очлик, қийинчилик бўлган кезларда.
  • Изғиринли кунлар шундай ўтарди,
  • Ҳар хил ваҳимада келарди хатлар.
  • Шунда ҳам шукрни ўргатишарди
  • Бизга кўпни кўрган нуроний зотлар.
  • “Хўп” дейиш бизларга қоида эди,
  • Катталар не деса, гап қайтармасдик.
  • Бошга қанча ташвиш келиб-кетса ҳам
  • Она табиатга шукр айтардик.
  • Биров нолибди деб эшитмаганман,
  • Ношукрлик қилмас эди қизлар ҳам.
  • Шоли ўтар эдик, ғўза чопардик,
  • Ўн бешга тўлмаган эдик бизлар ҳам.
  • Не бўлди сизларга, ўғил-қизларим,
  • Шарму ҳаё қани, сабру қаноат.
  • Сабрнинг остини олтин дейдилар,
  • Баъзи камчиликка қилинг-да тоқат.
  • Тегирмон, обжувоз, жувозхонани
  • Ҳатто тасаввур ҳам қилмассиз балки.
  • Ол, сенга нон сероб, усти бош сероб,
  • Шунданми, қадрини билмассиз балки.
  • Шукр, саломатсан, тинчсан, омонсан,
  • Ўқисанг мактаб бор, ишласанг иш бор.
  • Еганинг олдингда, дориломонсан,
  • Очиқ гап, бахтлисан, толеингдир ёр.
  • Бесабр бўлмагин, иззат-эҳтиром,
  • Йўқолиб қолмасин каттага ҳурмат.
  • Бебош фарзанд бўлма, хулласи калом,
  • Недир камроқ бўлса айлагин тоқат…
  • Шукр қил ҳаётга, азиз фарзандим,
  • Шукр асли асл инсон учун хос.
  • Ўғлимсан, қизимсан, менинг дилбандим,
  • Розиман, сўзимга амал қилсанг бас.

ИМОН

  • Таажжуб қиламан баъзи одамга,
  • Тили бир бошқаю дили бошқача.
  • Шунданми адашган босган қадамда,
  • Ривожин кўрмадим шунча ёшгача.
  • Мунофиқлик қилма, эзилар виждон,
  • Виждон эзилгани сенинг сўлганинг.
  • Беш кунлик дунёда кетмасин имон,
  • Имоннинг кетгани хазон бўлганинг.
  • Ҳақиқат бир нурки, нури имондир,
  • Одамлар билмайди дейсан, билади.
  • Бугун билдирмадинг, имон туғёндир –
  • Барибир эртага маълум қилади.
  • Имон бу – ишончу инсоф, диёнат,
  • Қалбингда муҳаббат, ишда қаноат.
  • Имони саломат одамни дерлар:
  • Бу одам покиза, жуда аломат.
  • Ўзинг пок, дилинг пок, сўзинг пок бўлсин,
  • Онанг оқ сут берган, ўшани оқла.
  • Босиб ўтган йўлинг гулларга тўлсин,
  • Азизим, имонни саломат сақла!..

ДИЛБАР

  • Термилиб қолдинг деб қилма хижолат,
  • Кўркам жамолингда кўрдим камолот,
  • Бахтимга бор бўлгин соғу саломат,
  • Шошма, суратингни чизяпман, дилбар.
  • Воажаб, ёноқлар ёниб турарму,
  • Қўл деган шунчалар қайноқ бўларму,
  • Одамни шунчалар муштоқ қиларму,
  • Шошма, суратингни чизяпман, дилбар.
  • Бунча ҳам ярашгай сенга сунбул соч,
  • Ўсмали қошларинг худди қалдирғоч,
  • Юрак сирларингни бир дамгина оч,
  • Шошма, суратингни чияпман, дилбар.
  • Шошма, қимирлама, юзлари гулгун,
  • Бодом қабоғингнинг буржида тугун,
  • Хол борми, билолмам, кулиб тур бугун,
  • Шошма, суратингни чизяпман, дилбар…

ЗАВҚИ ЎЗГАЧА

  • Бу йилги баҳорнинг файзи бўлакча,
  • Завқи ўзгачадир, латофати ҳам.
  • Боғу бўстонларда, дала-қирларда
  • Баҳор гулларининг таровати ҳам.
  • Сахий даламизга меҳр ила боқдим,
  • Кўркамлик шундаю дилбарлик шунда.
  • Дон шунда, нон шунда, шунда “оқ олтин”,
  • Ҳатто бир-бирига дилдорлик шунда.
  • Бу баҳорда тўкин тўйлар бўлажак,
  • Бу баҳор ҳар қанча мадҳ этилса оз.
  • Шунданми табиат бор бисотини
  • Одамлар йўлига қилди пойандоз.

МЕҲМОН БЎЛИНГ

Ғафур Ғуломга ўхшатма
  • Ўйлаб кўрсам беҳуда йўл босмабмиз,
  • Қатор-қатор ишлар қилдик изма-из.
  • Мактаб қурдик, фахрлансак ҳақлимиз,
© BOOK 2025
Контакты для правообладателей
[email protected]