Жанры
Регистрация
Читать онлайн TO‘POLONCHI CHUMCHUQLAR бесплатно

TO‘POLONCHI CHUMCHUQLAR



She’rlar

BULBULCHA

  • Bulbul qo‘nib shoxchaga,
  • Sayrab berdi barchaga.
  • Hamma undan bo‘ldi shod,
  • Ko‘ngil ham bo‘ldi obod.
  • Hoy, bulbulcha, bulbulcha,
  • Mana senga gulg‘uncha.
  • Ko‘rib sen qilgin havas,
  • Shodlik bo‘lsin hamnafas.
  • Yurgin sen yayrab, yayrab,
  • Tong chog‘i sayrab, sayrab.
  • Quvnaylik ikkalamiz,
  • Bir-birimiz do‘st saylab.

UYQUCHI MUSHUK

  • Mushuk chiqdi oftobga,
  • O‘xshab go‘yo betobga.
  • Ayyorlik qilib qoldi,
  • Sichqonni tutib oldi.
  • Endi uning qorni to‘q,
  • Hech kim bilan ishi yo‘q.
  • Uyquni qilmas kanda,
  • U shundayin arzanda.
  • – Hoy Baroqvoy, Baroqvoy,
  • Tur o‘rningdan, turaqol.
  • Mana senga sut va non,
  • Maza qilib yeya qol.
  • Erinib turdi mushuk,
  • Shundayin qildi tushlik.
  • Uyquga to‘ymas har kun,
  • Mudrab yurar shuning-chun.
Рис.0 TO‘POLONCHI CHUMCHUQLAR

LAYLAK

  • Samoda uchar laylak,
  • Kiyib yangi oq ko‘ylak.
  • Libosiga bir qarang,
  • Tovlanadi oppoq rang.
  • Laylak qanot qoqadi,
  • Bo‘yniga dur taqadi.
  • Hamma unga boqadi,
  • Bu hol menga yoqadi.
  • Xayolimni oldi-ku,
  • Menga yoqib qoldi u.
  • Endi nima qilaman,
  • U bilan do‘st bo‘laman.
Рис.1 TO‘POLONCHI CHUMCHUQLAR

QURBAQAJON

  • – Qurbaqajon, qurbaqa,
  • Usting nega kir-chaqa.
  • – Cho‘milaman kunda men,
  • Rangim o‘zi shunaqa.
  • – Nega sekin yurasan?
  • Yoki sen kasalmisan?
  • – Men kasal emasman, yo‘q,
  • Hozir juda qornim to‘q.
  • – Pashsha, chivin ko‘paysa,
  • Senga ozor beradi.
  • – Ular mening nonushtam
  • Uchun kerak bo‘ladi.
  • Menga sira tegmagin,
  • Aslo ozor bermagin.
  • Zararimdan foydam ko‘p,
  • Chivinlarni yeyman xo‘p.

G‘OZ

  • G‘oz yuradi kerilib,
  • Xayollarga berilib.
  • Jo‘jalari izida,
  • Quloq solmas so‘ziga.
  • Ko‘chaning o‘rtasiga
  • Chiqib ketdi bittasi.
  • Mashina keldi birdan –
  • Tomoshaning kattasi.
  • Ko‘chada yurishni ham
  • O‘rganish kerak axir.
  • Ko‘chada ham bor qonun,
  • O‘rgatish kerak axir.
  • G‘oz aytibdi jo‘jaga:
  • – Quloq solgin so‘zimga.
  • Chiqsang agar ko‘chaga,
  • Qarab yurgin ko‘zingga.

QUYOSH

  • Chiqib kelar ertalab,
  • Tog‘ ortidan mo‘ralab.
  • Aytsam sizga bu – Quyosh,
  • Mehri cheksiz, beqiyos.
  • Nur sochib u olamga,
  • Jilmayib ham qo‘yadi.
  • Nur sochishi chiroyli,
  • Bag‘rin ochib suyadi.
  • Yog‘dusi taram-taram,
  • Unga sirli boqaman.
  • Quyoshni quchgim kelar,
  • Unga men ham yoqaman.
  • Hayot sururi kitob,
  • Ezgulikka u xitob.
  • Oftob – kitobga o‘xshar,
  • Kitob oftobga o‘xshar.

TO‘POLONCHI CHUMCHUQLAR

  • Chumchuq dedi chumchuqqa,
  • Tushiraymi tumshuqqa.
  • Unisi ham bo‘sh kelmay,
  • Yurgin dedi bu yoqqa.
  • Ikki chumchuq urishdi,
  • Patlarini yulishdi.
  • Bu tekin tomoshaga
  • Boshqalar ham kelishdi.
  • Bo‘ldi janjal, to‘polon,
  • Hali ular polapon.
  • Shunday bo‘lsa ham ular,
  • Bir-birini yumdalar.
  • Bu janjalkash chumchuqlar,
  • Don, suv uchun talashar.
  • Bir bahona izlashib,
  • Har tomonga qarashar.
  • Kelib qoldi onasi,
  • Kimdir aytgan chamasi.
  • So‘rdi janjal sababin,
  • Nima deb bahonasi.
  • Tanbeh berib ularga
  • Dedi: – Bu qanday janjal.
  • Tartibsizlik, bedodlik
  • Qilasiz ketsam har gal.
  • Izza bo‘lgan chumchuqlar
  • Bir so‘z deyishmas emish.
  • Ammo o‘shandan beri
  • Janjal qilishmas emish.

TOYCHOG‘IM, O‘YINCHOG‘IM

  • Olib berdilar toychoq,
  • Tirik emas, o‘yinchoq.
  • Bo‘ynida bor qo‘ng‘iroq,
  • Yoli, dumi qo‘ng‘irroq.
  • O‘ynab aslo to‘ymayman,
  • Qo‘limdan hech qo‘ymayman.
  • Ukam yig‘lab, ber deydi,
  • Lekin bergim kelmaydi.
  • Agar bersam men unga,
  • Ustiga chiqib olar.
  • Unga qamchi uradi,
  • Toychog‘im yig‘lab qolar.
  • Desam: – Nega urasan?
  • – Axir u chopsin, deydi.
  • – Yugurishni bilmasa,
  • Boshqa ish topsin, deydi.

PASHSHA

  • Pashsha g‘uv-g‘uv etadi,
  • Iflos joyga o‘tadi.
  • Iflos joydan kir olib,
  • Yuz-qo‘liga surtadi.
  • Hamma joyni toza tut,
  • Pashsha tuxumin qurit.
  • Axlatlarni tashlamay,
  • Erinchoqlikni unut.
Рис.2 TO‘POLONCHI CHUMCHUQLAR

OLAPAR

  • Juda-juda yoqimtoy
  • Kuchugim bor Olapar.
  • Hovlida kutib meni,
  • Erkalaydi har safar.
  • Likillatib dumini,
  • Qulog‘ini, burnini.
  • Har xil qiliq qiladi,
  • Buni o‘zi biladi.
  • Kechikib qolsam goho,
  • Yo‘lim poylaydi tanho.
  • Udir menga vafodor,
  • Shu sabab men baxtiyor.

FIL YIG‘LADI

  • – Fil ham yig‘laydimi, otajon?
  • So‘rab qoldi qizim Guljahon.
  • – Qizim, nega unday deysan sen?
  • So‘roq qildim bo‘lib men hayron.
  • – Men ko‘rdim hayvonot bog‘ida,
  • Filni yig‘lab turgan chog‘ida.
  • – Balki sog‘ingandir otasin,
  • Sog‘ingandir balki onasin.
  • – Eh, tezroq kelishsin ishqilib,
  • Kasal bo‘lib yotib qolmasin.

BOBOM EKKAN OLMALAR

  • Bobom ekkan olmalar
  • Oy nurida tovlanar.
  • Terib keldi bir savat,
  • Oldik navbatma-navbat.
  • Maza qilib yedik biz,
  • So‘ngra rahmat dedik biz.
  • Qoyil qoldik barchamiz,
  • Yetishtirgan oltin kuz.
  • Bog‘bon otamga rahmat,
  • Siz ham keling, marhamat.
  • Ochiq doim dasturxon,
  • Sizni qilaman mehmon.

SHAFTOLI

  • Shaftolijon, shaftoli,
  • Shaftolingdan beraqol.
  • Maza qilib yeyman men,
  • So‘ngra rahmat, deyman men.
  • Shaftoli egib shoxin,
  • Mana, olaqol deydi.
  • Terib oldim bir etak,
  • Axir ukam ham yeydi.
© BOOK 2025
Контакты для правообладателей
[email protected]